‘अ’ को श्रृंगार

म आज अस्थिर भएको छु

आफैंमाथि अविश्वास पलाएको छ

अशक्त अनुभव गरेको छु

समयले सायद अस्विकारेको छ।

अनिश्चितता, असन्तुष्टि र असफलता

सबैले धकेलिरहेछ अंधकारतिर

खै, खोज्न त चाहन्छु म

अ हटाईकन ती सबै।

तर हरेक पाइला अगाडी बढाउॅंदा

अझै अर्को पाइलाको स्थान देख्दछु

जति जति स्थिरतातिर लम्किन खोज्छु

त्यति नै अस्थिर भईदिन्छु।

निश्चित त केवल काल हो भन्छन्

तर खै, त्यसमा पनि म देख्छु

एक भयानक अनिश्चितता

अकालै पो आउने हो की, ठेगानै छैन

सायद यही हो- निश्चितताको अनिश्चितता।

मेरो मन त आज अशान्त छ नै

होला, अन्य नेपालीको मन पनि

जतिसुकै अप्रिय लागे पनि

कामना छ केवल अखण्ड नेपाल कै ।।